პირველი მარკეტინგული აუდიტი: რას მოიცავს და რას მიიღებ

მარკეტინგული აუდიტი იმის სტრუქტურირებული შემოწმებაა, რა მდგომარეობაშია შენი მარკეტინგი დღეს: ბრენდი, საიტი, ძიება, სოციალური არხები, რეკლამა და ის, რაც ამ ყველაფერს ზომავს. პირველი მარკეტინგული აუდიტის შედეგი ქულა ან ორმოცგვერდიანი რეპორტი კი არ უნდა იყოს, არამედ მოკლე სია: რა მუშაობს, სად იკარგება ფული და ყურადღება და რა გამოასწორო პირველ რიგში.

ქვემოთ წერია, რას ამოწმებს კარგი აუდიტი, რა სჭირდება მას შენგან, რა უნდა მიიღო ბოლოს და როგორ გააკეთო მისი მოკლე ვერსია თავად, ერთ საათში.

გაზომვა: ყველაფრის საფუძველი

აუდიტი გაზომვით იწყება, რადგან ყველა სხვა დასკვნა მასზეა დამოკიდებული. სამი კითხვა:

• ითვლის თუ არა ანალიტიკა შედეგს? Google Analytics 4-ში მოვლენებს, რომლებიც ბიზნესისთვის მნიშვნელოვან ქმედებებს ზომავს, ახლა key events ჰქვია (ადრე conversions ერქვა); ეს ცვლილება Google-მა 2024 წლის მარტში გამოაცხადა. შეამოწმე, მონიშნულია თუ არა ასეთად ფორმის გაგზავნა, ზარის ღილაკზე დაჭერა ან შესყიდვა.
• იღებს თუ არა სარეკლამო პლატფორმა სწორ სიგნალს? Meta-ს Conversions API მარკეტინგულ მონაცემებს შენი სერვერიდან, საიტის პლატფორმიდან, აპლიკაციიდან ან CRM-იდან პირდაპირ Meta-ს უკავშირებს, და Meta-ს თქმით, პიქსელთან ერთად გამოყენებისას უფრო საიმედო კავშირს ქმნის.
• როგორ მუშაობს თანხმობა? Google-ის consent mode ვიზიტორის თანხმობის სტატუსს Google-ს გადასცემს, ტეგები კი ქცევას მისი არჩევანის მიხედვით ცვლის. შეამოწმე, მართლა არის თუ არა ქუქი-ფაილების ბანერი ტეგებთან დაკავშირებული.

ძიება

პირველი შემოწმება ყველაზე მარტივია. Google-ის SEO-ს საწყისი გზამკვლევი გირჩევს, საიტი site: ოპერატორით მოძებნო; თუ შედეგები შენს საიტზე მიუთითებს, ის ინდექსშია. შემდეგ Search Console. Page indexing რეპორტი გაჩვენებს, რომელ გვერდებს პოულობს და ინდექსირებს Google და რატომ ვერ მოხვდა ინდექსში დანარჩენი, Performance რეპორტი კი გაჩვენებს, რომელი საძიებო მოთხოვნებით შემოდიან საიტზე და თითოეულისთვის კლიკებს, ჩვენებებს, CTR-სა და საშუალო პოზიციას. აქ შეიძლება პირველი სიურპრიზი დაგხვდეს: გვერდი, რომელიც ყველაზე მნიშვნელოვანი გეგონა, ძიებაში შეიძლება საერთოდ არ ჩანდეს.

საიტი

სამი რამ. სისწრაფე ტელეფონზე, Google-ის Core Web Vitals-ის ზღვრებით: LCP 2,5 წამამდე, INP 200 მილიწამამდე, CLS 0,1-მდე. ფორმა, რომელიც მართლა იგზავნება და სწორ ადამიანამდე მიდის. და კონტაქტი, რომელიც პირველ ეკრანზე ან ერთი დაჭერით ჩანს. ბოლო ორი პუნქტი ტექნიკურთან ერთად პრაქტიკულ შემოწმებასაც მოითხოვს: გააგზავნე სატესტო მომართვა და დარწმუნდი, რომ სწორ ადამიანამდე მივიდა.

კონტენტი და სოციალური არხები

აქ პოსტების რაოდენობაზე მეტად სამ რამეს აქვს მნიშვნელობა: აქვს თუ არა ყოველ არხს მკაფიო დანიშნულება, ჰგავს თუ არა ბოლო ათი პოსტი ერთ ბრენდს და რა ხდება კომენტარებსა და შეტყობინებებში, ანუ რამდენ ხანში პასუხობენ და პასუხობენ თუ არა საერთოდ. დაწვრილებით: რა არის SMM და რას უნდა ელოდოს ბიზნესი მისგან.

რეკლამა

აუდიტი ამოწმებს, რაზეა ოპტიმიზებული კამპანიები და ემთხვევა თუ არა ეს ბიზნესის მიზანს, რამდენ ნაწილადაა დაყოფილი ბიუჯეტი და რეკლამების რამდენი ნაკრები (ad set) რჩება სწავლის ფაზაში. Meta-ს თქმით, რეკლამების ნაკრები სწავლის ფაზიდან, როგორც წესი, მაშინ გამოდის, როცა ბოლო მნიშვნელოვანი ცვლილებიდან ერთი კვირის განმავლობაში დაახლოებით 50 შედეგს დააგროვებს, მცირე ბიუჯეტის ბევრ ნაწილად დაყოფა კი ამას ართულებს. და ერთი კითხვა, რომელიც ტექნიკური არ არის: ვის ეკუთვნის სარეკლამო ანგარიშები. დაწვრილებით: Meta რეკლამა vs Google რეკლამა: რა აირჩიო მცირე ბიუჯეტით.

ბრენდი

თანმიმდევრულობა ყველა შეხების წერტილში: საიტი, სოციალური არხები, რეკლამა, შეფუთვა, ელფოსტის ხელმოწერა. ერთ ბრენდს ჰგავს თუ ოთხ სხვადასხვა კომპანიას? თუ ოთხს, საქმე სისტემაშია და არა ლოგოში: ლოგო vs ბრენდის სისტემა: რა გჭირდება სინამდვილეში.

მარკეტინგული აუდიტი: რა სჭირდება შენგან

პირველი ეტაპისთვის მხოლოდ საჯარო ინფორმაცია: საიტი და არხები. ამითაც ბევრი ჩანს: სისწრაფე, ინდექსირება, კონტენტი, ბრენდის თანმიმდევრულობა და რეკლამა, რომელიც ხილულია. უფრო ღრმა აუდიტს Analytics-ზე, Search Console-სა და სარეკლამო ანგარიშებზე მხოლოდ ნახვის უფლებით წვდომა სჭირდება. წვდომა როლის მინიჭებით მიეცი და არა პაროლის გაზიარებით, და აუდიტის დასრულებისას გააუქმე.

რა უნდა მიიღო ბოლოს

კარგი აუდიტის შედეგი მოკლეა. სამი ნაწილი: რა მუშაობს და რას არ უნდა შეეხო; სად იკარგება ფული ან ყურადღება; და ერთი ნაბიჯი, რომელიც პირველ რიგში უნდა გადადგა. ყოველ პუნქტში უნდა ეწეროს მიზეზი, რა სჭირდება გამოსწორებას და როგორ მიხვდები, რომ გამოსწორდა. თუ რეპორტი იმდენად გრძელია, რომ ბოლომდე ვერ კითხულობ, ის შენთვის კი არა, პრეზენტაციისთვის დაიწერა.

ვინ უნდა ჩაატაროს

შენმა გუნდმა კონტექსტი და ისტორია იცის, და სწორედ ეს ხდის ზოგ პრობლემას მისთვის უხილავს: ფორმა, რომელიც ყოველთვის ძველ მისამართზე იგზავნებოდა, ანგარიში, რომელიც წლების წინ „ვიღაცამ“ შექმნა. გარე შემფასებელს მსგავსი ხარვეზების აღმოჩენა შეუძლია, თუმცა მიზეზების გასაგებად გუნდის კონტექსტიც სჭირდება. საუკეთესო პირველი აუდიტი ორივეს იყენებს: ჯერ გარედან აფასებს იმას, რაც ჩანს, შემდეგ კი ესაუბრება იმ ადამიანებს, ვინც იცის, რატომაა ყველაფერი ისე, როგორც არის.

აუდიტის შემდეგ

პირველი ნაბიჯი ერთ თვეში გადადგი და წინასწარ ჩაწერე, რა უნდა შეიცვალოს, თუ ის იმუშავებს: მეტი მომართვა ფორმიდან, გვერდის გამოჩენა ძიებაში, ნაკლები უპასუხო შეტყობინება. შემდეგ ისევ შეხედე. აუდიტი, რომელსაც განმეორებითი შემოწმება არ მოსდევს, რეპორტია და არა პროცესი. მეორე აუდიტი პირველზე მოკლეა, რადგან კითხვები უკვე ცნობილია.

სამი ხაფანგი

• აუდიტი, როგორც გაყიდვების პრეზენტაცია. თუ ყოველი დასკვნა ერთი და იმავე სერვისით მთავრდება, ეს აუდიტი არ ყოფილა.
• ავტომატური ქულა. ინსტრუმენტის „62/100“ არაფერს ამბობს, სანამ ვინმე არ აგიხსნის, რომელი პუნქტის გამოსწორება ღირს და რომლის არა.
• ყველაფერი ერთდროულად. ერთდროულად გაცემული ბევრი რეკომენდაციის შესრულება რთულია. რეკომენდაციები მნიშვნელობისა და საჭირო რესურსის მიხედვით უნდა დალაგდეს.

მინი-აუდიტი ერთ საათში

1. მოძებნე site:შენი-დომენი და ნახე, ჩანს თუ არა შენი მთავარი გვერდები.
2. Search Console-ში გახსენი Performance და ნახე, რომელი ძიებებით მოდიან.
3. GA4-ში შეამოწმე, მონიშნულია თუ არა მთავარი ქმედებები key events-ად.
4. საკუთარი საიტის ფორმა თავად შეავსე და ნახე, სად მივა.
5. მთავარი გვერდი PageSpeed Insights-ში გაატარე, მობილურზე.
6. გადაამოწმე, ვის სახელზეა დომენი და სარეკლამო ანგარიშები.
7. წაიკითხე ბოლო ათი კომენტარი და შეტყობინება და ნახე, როდის და როგორ უპასუხეს.

როგორ მუშაობს MRKFLOW-ის უფასო აუდიტი

ჩვენი უფასო აუდიტი სწორედ ამ პირველ ეტაპს მოიცავს: მხოლოდ საჯარო ინფორმაცია, ანგარიშებზე წვდომის გარეშე, შეხვედრა კი მხოლოდ მაშინ, თუ რეპორტის შემდეგ თავად მოისურვებ. შენს ბრენდს, კონტენტს, მედიასა და ციფრულ არხებს ჩვენი ჩეკლისტით ვამოწმებთ და მოკლე წერილობით რეპორტს გიგზავნით: რა მუშაობს, სად იკარგება რესურსი და რომელ ნაბიჯს გადავდგამდით პირველ რიგში. რეპორტი ნებისმიერ შემთხვევაში შენი რჩება. თუ გაზომვის სწორად აწყობა გჭირდება, ამაზე ანალიტიკისა და რეპორტინგის გვერდზე ვწერთ.